Die Kerkpad
"Laat ons wandel in die lig van die Here"
(Jes 2 ; 3 - 5)

Jaargang 8  No 4 Julie 2004

KERKLIKE JOERNAAL

NOG GEEN VERSOENING TUSSEN GEREFORMEERDES IN ORANIA NIE

Voortspruitend uit 'n besluit van die Sinode 2003 het daar verskeie ad hoc besprekings plaasgevind tussen afgevaardigdes van die sinode en die klassisse Griekwaland-Wes en Krokodilrivier, asook die kerkrade van Kimberley en Orania (Dordt). Die gemeenteblad, Dordt-Nuus van April 2004 vermeld "van die kerkraad se tafel", dat daar helaas op hierdie stadium geen positiewe resultate is nie. Die berig lui as volg:

Klassis Krokodilrivier: Die sitting op 16 Maart het twee sake hanteer wat direk op Orania slaan. Die eerste was dat ons rapporteer het dat die versoening met Kimberley en die klassis Griekwaland-Wes nie verder gegaan het nie, omdat Kimberley nie hul belofte nagekom het om die saak ten opsigte van die vervolging van di Smit en Ligthelm skriftelik af te sluit nie. Ook het die sinodale deputate nie toegesien dat die toegewings van Kimberley op die agendas van klassis Griekwaland-Wes en Part Sinode Noordwes kom sodat hulle vorige besluite in ooreenstemming gebring kon word met die toegewings van Kimberley nie. (Die kerkraad het beide aspekte skriftelik in Februarie onder die aandag van Kimberley en die sinodale Deputate gebring, tot nog toe sonder reaksie.) Die tweede saak is dat Orania se beskrywingspuntby die vorige sitting (September 2003) om die Nuwe Vertaling vir kerklike gebruik af te wys, geen rapport opgelewer het nie en na nuwe deputate verwys is vir rapportering op die September 2004-vergadering.