Die Kerkpad
"Laat ons wandel in die lig van die Here"
(Jes 2 ; 3 - 5)

Jaargang 8  No 2 Maart 2004

KERKLIKE JOERNAAL

MEERDERHEID VAN NEDERLANDSE HERVORMDE KERK

"SAMEN OP WEG"

MET LUTHERSE EN (SINODAAL) GEREFORMEERDE KERKE IN NEDERLAND

Dit is al vir nagenoeg veertig jare dat in Nederland die (sinodaal) Gereformeerde Kerke, saam met die Lutherse Kerk en (plaaslik afwykend) met 'n groot deel van die Nederlands Hervormde Kerk 'n verbintenis aangegaan het onder die naam van "Samen op Weg". Die Aksie Leer- en Lewenskwessies, (lees op bl 9) vermeld nou dat die tradisionele naam van Nederlands Hervormde Kerk prysgegee is met die finale besluit vir samesmelting. Dié besluit is wat die Hervormers betref met net-net 'n tweederde meerderheid geneem. Leer- en Lewenskwessies beskryf dit as volg:

ONS MOEDER VERDWYN. Ons moederkerk, die Nederlandse Hervormde Kerk, gaan van 1 Mei 2004 nie meer bestaan nie! Nie meer onder die eeue oue naam nie!

Die Gereformeerde Kerk en die Lutherse Kerk en die Nederlandse Hervormde Kerk het na 40 jaar se onderhandelinge op 12 Desember 2003 besluit om saam te smelt (fusie). Die twee ander Kerke het maklik daartoe ingestem maar die Hervormde Kerk het net-net die vereiste 2/3 meerderheid daarvoor verkry. 51 het daarvoor gestem en 24 daarteen. Die besluit is dus net met 2 stemme verkry! Die Hervormers wat daarteen was, het hoofsaaklik beswaar teen Lutherse belydenisskrifte, en die ou naam wat nou verdwyn. Van 1 Mei 2004 is daar nie meer ’n Nederlandse Hervormde Kerk nie, maar: De Protestantse Kerk in Nederland.