Die Kerkpad
"Laat ons wandel in die lig van die Here"
(Jes 2 ; 3 - 5)

Jaargang 8  No 2 Maart 2004

OMSTREDE "CHRISTUS-PRENT" OPNUUT IN DIE KOLLIG

SAPA-AFP (New York) berig in BEELD, Donderdag 19 Februarie 2004, dat baie geld uit Christus-prente verwag word.

"'n Jaar gelede sou niemand dié fliek versprei nie. Nou is dit die mees bespreekte fliek sedert die eerste Star Wars.

Mel Gibson se fliek The Passion of the Christ, wat volgende week in die VSA uitgereik word, is een van die mees omstrede flieks tot nog toe.

Met al die gepraat oor die fliek verwag fliekbase dat die opening hulle $15 miljoen (sowat R180 miljoen) tot dubbel soveel in die sak gaan bring. Dit vir 'n fliek wat in Latyns en Aramees is sonder enige bekende akteurs.

Gibson se produksiemaatskappy, Icon, het kerke en ander groepe as bemarkingsvennote aangestel en die fliek op gemeentes eerder as op die pers gemik.

The Passion maak veral opslae oor sy kamerawerk, redigering en die akteurs se spel.

'Gaan kyk na die fliek', is die raad van ene Chaput, een van die kerkleiers wat een van die spesiale vertonings gesien het. 'Jy sal nooit weer dieselfde voel as jy die gedeeltes in Die Bybel lees wat in die fliek gewys word nie'."