Die Kerkpad
"Laat ons wandel in die lig van die Here"
(Jes 2 ; 3 - 5)
Jaargang 8 No 3 Mei 2004
KERKLIKE JOERNAALMASSALE DEMONSTRATIEWE MULTI-KULTURELE
SINKRETISTIESE GEBEDSBYEENKOMSTE OP SONDAG 2 MEI 2004
Miljoene Christene van alle denominasies, taal- en kultuurgroepe gaan op Sondag, 2 Mei 2004, in meer as 46 Afrika-lande bymekaar kom om in gebed te verenig.
Berig in Kruispunt [NG] blad oor kerk- en geloofsake, 25/26/27 Maart 2004, bl 2
Sowat 5 miljoen Christene gaan na verwagting in gebed vir Afrika verenig tydens die Transformasie Afrika-projek. In Suid-Afrika gaan meer as 200 dorpe deelneem aan hierdie grootste byeenkoms ooit van Christene. Hulle sal onder andere vir mense wat deur MIV/vigs geraak word, bid.
Vanaf groot stadions soos Ellispark, Kingsmead, Telkompark en Nuweland tot by kleiner plekke soos skoolsale, burgersale en kerkgeboue gaan Christene in hulle duisende saamtrek. Selfs dorpe soos Jozini in die heuwels van Kwazulu-Natal, Idutywa, Colesberg en Britstown is betrokke by Transformasie Afrika.
Dit is vanjaar die vierde jaar dat so 'n dag gereël word. Elke byeenkoms volg sy eie program, maar al die gebedspunte sal oor ses sake in gebed verenig, naamlik
MIV-vigs
Misdaad
Geweld
Werkloosheid en armoede
Rassisme en seksisme
Familie-krisisse
Die byeenkoms op Nuweland in Kaapstad sal van 12:30 tot 16:30 op TBN (DSTV) gebeeldsend word.