Die Kerkpad
"Laat ons wandel in die lig van die Here"
(Jes 2 ; 3 - 5)

Jaargang 8  No 6 November 2004

KERKLIKE JOERNAAL

EKUMENIESE EENHEID VIR GEREFORMEERDES BEPLEIT

Neels Jackson berig in BEELD, Vrydag 5 Maart 2004, dat op Donderdag 4 Maart op 'n vergadering van die Konvent van gereformeerde kerke te Potchefstroom, 'n ernstige pleidooi gelewer is dat die betrokke kerke aan 'n vorm van eenheid tussen hulle begin werk.

Volgens dr Willie Botha van die NG Kerk is daar geen vordering in die proses om eenheid in die NG kerkfamilie te bereik nie.

Daarom het die gedagte ontstaan dat dit dalk eerder sal werk om alle gereformeerde kerke in die land byeen te kry. Verteenwoordigers van twaalf kerkelike groeperings was op daardie konvent byeen.

Botha het gesê die betrokke kerke moet ernstig daarna kyk om iewers met 'n vorm van eenheid te begin, want alleen is die kerke te klein om hul stemme in die land te laat hoor.

Dit is 'n vergestalting van ekumeniese betrekkinge buite die skriftuurlike opdrag, taak, regering en onderskeid tussen waar en vals, soos die NGB, artikels 27 tot 30, die kerk beskryf. Die redaksie van DieKerkpad beskou dit as relativering van die antitese wat die Bybel openbaar, wat God wil ons moet handhaaf.