Die wat die sinodebesluite geheel of gedeeltelike aanvaar en uitvoer,

Die wat die sinodebesluite verbygaan en rustig volgende sinodes afwag en intussen toetsing daarvan doen. Hulle handhaaf dus steeds die ou bekende praktyke sonder om oor die nuwe besluite pertinent te handel.

Dan is daar die wat dié verskeurende besluite met motivering verwerp het en die redes daarvoor per skrywes aan kerke in die kerkverband bekend gemaak het. Enkele van laasgenoemde kerke het met voorligting en gespreksvoering begin. Etlike predikante, ampsdraers en lidmate het as indiwidue hulle reeds daarby gevoeg en/of intense meelewing in die gesprekvoering getoon.

Die besluite wat die spanning veroorsaak het, is:

die aanbeveling van die 2001-omdigting wat nie aan die vereistes van getroue Skrifliedere voldoen soos die vorige sinodes bepaal het nie,

asook die besluit dat vroue tot die diakenamp verkies mag word, wat in stryd met die Skrif is (soos wat Sinode 1988 na omvattende studie besluit het).

Uit die motiverings vir die besluite (soos tydens die sinode asook later in openbare kerklike literatuur verwoord) word ‘n relativerende post-modernistiese Skrifbeskouing en Skrifhantering bemerk, tesame met ‘n soortgelyke Godvoorstelling, mensbeskouing en kerkleer.

Voortspruitend ondergaan baie kerke van die GKSA ernstige transformasies in die inkleding van hulle eredienste. Die wyse van nagmaalsviering asook die invoer van jeugdienste en so meer veroorsaak groot spanning. Sodoende het daar ‘n behoefte ontstaan om ‘n konferensie te belê waarop hierdie sake bespreek sal word. Uiteraard sal daar primêr indringend gekyk word na die sinodebesluite wat die onrus veroorsaak het. Dit is die opregte strewe van die samewerkende kerkrade om die eenheid en die reformasie van die Kerk te soek en die eer van die Here Jesus Christus te handhaaf.

Die volgende kerkrade aanvaar verantwoordelikheid vir die oproep tot die bywoning van hierdie konferensie en die organisering daarvan:

Die Gereformeerde Kerke Waterberg (Dolerend), Pretoria, Pretoria-Die Kandelaar, Ficksburg, en Hennenman / Senekal / Ventersburg (kombinasie).

Indien u kerkraad van oordeel is dat met bogenoemde in gedagte oor die sinodebesluite besin moet word, dan word u versoek om twee broeders af te vaardig om hierdie konferensie by te woon. Indiwiduele ampsdraers en belangstellende lidmate is ook welkom om in persoonlike hoedanigheid die konferensie by te woon.

Nadere besonderhede sal deur middel van die kerklike pers en ander media bekendgestel word.