Die Kerkpad
"Laat ons wandel in die lig van die Here"
(Jes 2 ; 3 - 5)
Jaargang 3 No 1 Januarie 1999
REDAKSIONEEL
Dit is nie sonder bekommernis nie maar nogtans met 'n vaste vertroue op die God van die Verbond en die Koning van sy kerk dat ons die nuwe jaar tegemoet gaan. Daar is heelwat sake waaroor besorgdheid bestaan. Afgesien van die persoonlike bestaan, met die alomteenwoordige omstandighede van geweld en misdaad, wat talle van ons medegelowiges reeds op die een of ander wyse getref of ervaar het, is daar die kommer oor die toekoms van die Here se kerk en die uitlewing en handhawing van die Christelike geloof.Daarom is dit ook vir die jaar wat voorl
ê die bepalende doelwit van die redaksie om deur middel van ons blad die aandag te vestig op die verbondstrou van die Here, ons God, en op grond daarvan te wys op die wederkerige eis om Hom volgens sy geopenbaarde Woord en wil asook volgens sy gebooie te dien in die persoonlike, kerklike en maatskaplike bestaan.Die polemiese benadering ten opsigte van wat as afwykings van die gereformeerde leer en kerkregering, asook die volkseie behoudende tradisie getipeer en beskryf word, spruit voort uit dié besorgdheid. Dit is nie bedoel - soos sommige meen en daarteen aanvoer - om doelgerig afbrekend teenoor persone te wees nie.
Sake kan egter nie van figure wat dit bedryf geskei word nie, daarom raak dit soms wél in 'n mate persoonlik. Nogtans moet dié polemiek in die perspektief van die onderhawige sake gestel en aanvaar en ook as sodanig benader en ter harte geneem word.