Die Kerkpad
"Laat ons wandel in die lig van die Here"
(Jes 2 ; 3 - 5)

Jaargang 6  No 1 Januarie 2002

REDAKSIONEEL

Al weer het 'n jaar verbygesnel. As mens agter die tyd wat verbygegaan het staan, is dit (ook vir ons as mense) soos 'n nagwaak (Ps 90: 4). Dis slegs die herinnerings wat oorbly. Die groot vraag is of ons die tyd uitgekoop het, dit wil sê, het ons altyd nougeset, nie as onwyses nie, maar as wyses gewandel in die besef dat die dae boos is? Het ons verstaan wat die wil van die Here is? Het ons in wysheid gewandel teenoor dié wat buite ons geloofsgemeenskap staan? (vgl Ef 5: 16, Kol 4: 5)

In elkeen se lewe was daar hoogte- en laagtepunte. Blydskap maar ook verdriet. Daar was rampe, dood en smart. Daar was ook die vreugde van liefde en trou wat ervaar is en nuwe lewe waaraan geboorte gegee is. Geslagte gaan en geslagte kom. Dis die kringloop van die tyd wat onder God se beskikking onverpoosd voortgaan.

As ons die balans opmaak, dan is daar baie negatiewe ondervindings as gevolg van die staatkundige bedeling waaronder ons bestaan. Die maat van misdaad, moord, roof en verkragtings is onmenslik hoog. Dit het ook nie aan ons eie mense verbygegaan nie. Die goddeloosheid in die vorm van seksuele bandeloosheid, dobbelary, korrupsie en tomelose hebsug vier hoogty. Dit is wat ons die afgelope jaar ervaar, en ons dag na dag ontstel en vererg het.

Het ons dit in die vrees van die Here belewe? Het ons dit in die krag van die geloof ervaar? Het dit ons teruggeroep na die onderhouding van die Here se gebooie en die nakoming van die eise vir die waaragtige diens aan Hom?

So staan ons aan die begin van 'n nuwe jaar, die jaar van ons Here: 2002. Dieselfde kringloop met hoogte- en laagtepunte. Misdaad en geweld gaan ook hierdie jaar weer daar wees. Ook vanjaar sal dit, menslik gesproke, weer 'n moeilike jaar wees. Maar in die perspektief van die Here se verbondstrou sal dit met die ware kinders van die Here goed gaan, hoe dit ook al sy!