Die Kerkpad
"Laat ons wandel in die lig van die Here"
(Jes 2 ; 3 - 5)
Jaargang 4 No 4 Julie 2000
KERKLIKE JOERNAAL BESLUIT NASIONALE SINODE GKSA 1955, ART 247 Artikel 247 handel oor die "insameling van fondse deur verkopings, konserte en kollektelyste". Die kernvraag is: Waar moet 'n kerkraad sy inkomste vandaan kry? Die antwoord is duidelik. Hy kry sy inkomste uit "tiendes". Dis wat ons in die Skrif vind. Daarmee word nie noodwendig bedoel 10% van die bruto of netto inkomste van 'n belydende lidmaat nie. Dit kan skenkings en boedeltoevallings ook insluit. Die saak is dat die kerkraad se fondse moet kom van die bydraes van sy lidmate.Die Sinodebesluit van 1955, artikel 247 lui soos volg:
'' Aangesien:
(a) dit deur die Heilige Skrif uitdruklik geleer word dat die kerklike diens deur die lidmate van die kerk self onderhou moet word (Matt 10:10; Luk 10:7; Kor 9:7-14; Gal 6:6) en art 11 KO so neergelę is in ooreenstemming met die Skrif.
(b) die Heilige Skrif verder leer dat daar die nouste verband moet bestaan tussen die bediening van die Evangelie en die onderhoud daarvan;
(c) ons in die Heilige Skrif die voorbeeld het van die oudste kerk, wat die verkoping van goedere nie self ter hand geneem het nie (Hand 4:34,37) en ook 'n heenwyse na die gevare aan sodanige praktyke verbonde (Joh 2:13-16; Matt 21:12,13);
(d) die geskiedenis leer dat die selfstandigheid en tewens die geestelike welstand van die kerk met hierdie beginsel gemoeid is, en verder
(e) daar teen die hou van verkopings tussen die insameling van gelde vir kerklike doeleindes en dié vir doelstellings wat val op die terrein van Christelik-nasionale en -maatskaplike lewe en
(f) daar teen die hou van verkopings en konserte as sodanig nie beswaar ingebring kan word nie, besluit die eerwaarde Sinode:
(1) dat die insameling van gelde vir kerklike doeleindes deur die hou van verkopings en konserte nie behoort te geskied nie en dat waar dit in gebruik is, daarmee nie voortgegaan behoort te word nie; maar dat die lidmate van die gemeentes volgens 'n bepaalde (persentasie-)stelsel, wat voldoen aan die vereistes van die Heilige Skrif, moet bydra;
(2) dat vir die insameling van gelde vir doeleindes wat val op die gebied van die Christelik-nasionale en -maatskaplike lewe, daar geen beswaar bestaan teen die hou van verkopings nie, mits die Christelike beginsels vir bedryf en vermaak hierby in ag geneem word. Hierby kan dan ook van kollektelyste gebruik gemaak word.''