Soos hiernaas (in die hoofartikel) en in ander artikels en inligting in hierdie uitgawe die veranderinge en verval van dié inrigting, sedert sy stigting, aan die orde gestel word, baar dit diep bekommernis by diegene wat nie bereid is om toe te gee aan die tydsgees en huidige staatkundige omstandighede en voorgeskrewe vereistes nie.

Soos vry algemeen en oral in ons land die sedelike verwildering toeneem, is dit ook die geval in Potchefstroom. Dit raak ook die morele standaard van dosente en studente op die kampus van die universiteit (vgl die berig oor die beskikbaarheid van kondome op die kampus van die PU vir CHO).

Is dit geoorloof om onder hierdie omstandighede die "uitwaartse beleid" voort te sit as die skadelike gevolge daarvan reeds sigbaar is en dit, onvermydelik, al hoe meer die prinsipiële karakter van die PU sal ondermyn en aantas? Sal ouers wat tot dusver  hulle kinders, op pad na volwassenheid, met 'n geruste hart aan die PU toevertrou het, dit onder die huidige omstandighede nog doen?

Dit is met deernis en diepe besorgdheid dat ons die verval van die universiteit wat in die verlede as 'n bolwerk van Calvinisme getipeer is, aanspreek en beskryf.

Mag meer en meer besef word dat die rigting wat bewus en dalk ook onder druk gekies en ingeslaan is, 'n heillose pad is ten opsigte van die koninkryk van God.