Die Kerkpad
"Laat ons wandel in die lig van die Here"
(Jes 2 ; 3 - 5)

Jaargang 7  No 4 Julie 2003

KERKLIKE JOERNAAL

CLOETE-OMDIGTING BERUS OP NAV 1983

In die briewekolom van BEELD, Dinsdag 1 Julie 2003, bevestig prof TT Cloete dat sy omdigting op die NAV en "natuurlik ook op talle ander bronne" berus.

Tot die ander bronne behoort ongetwyfeld ook die omstrede werke: Die Bybel in Praktyk en Die Bybellennium, onder redaksie van proff Wil Vosloo en Fika van Rensburg, albei sterk ondersteuners van die 1983 Bybelvertaling en die 2001- (Cloete) omdigting. Hierdie boeke onderskryf die nuwe teologiese benaderings soos dit in die debatte (daaromheen) na vore gekom het.

Prof Cloete skryf in sy brief onder andere as volg: "... Wat die Messiasvertolking betref, berus die Psalms in die Liedboek van 2001 op die Afrikaanse Bybelvertaling van 1983 en op die oorbekende debatte daaromheen - en natuurlik ook op talle ander bronne.

"Die Psalms in die Liedboek se beginpunt lê histories presies in die tyd van die verskyning van die 1983- Bybelvertaling en in die tyd van die debatte daaromheen."