Die Kerkpad
"Laat ons wandel in die lig van die Here"
(Jes 2 ; 3 - 5)

Jaargang 3  No 4  Julie  1999

DIE BOERE-AFRIKANER SE WEG VORENTOE

Met die verlies van sy staatkundige vryheid en onafhanklkheid verkeer die Boere-Afrikanervolk tans in moedeloosheid en koersloosheid wat met die toestand van dié ná die Tweede Vryheidsoorlog vergelyk kan word. Teen hierdie agtergrond reël die Akademie vir Christelik-volkseie Hoër Onderwys 'n beraad op DV 20 en 21 Augustus 1999 om oor die pad uit hierdie krisis uit te besin.

Die beraad word onder die opskrif Boere-Afrikaner, Quo Vadis? Boere-Afrikaner, Waar gaan jy heen? aangebied, wat teruggryp na die bekende woorde van dr DF Malan waarmee hy sy toespraak met die opening van die Voortrekkermonument, op 16 Desember 1949 afgesluit het. Wanneer 'n mens, 'n gesin, 'n gemeenskap en 'n volk in 'n krisistoestand verkeer, is dit aangewese om tot stilstand te kom en met inagneming van die verlede voorraad op te neem van die hede ten einde die weg na die toekoms sinvol te beoordeel. Alleen deur dit te doen word dit moontlik om koers uit die krisis uit te vat. Omdat die Voortrekkermonument 'n besondere simbool van die Boere-Afrikaner se volkskap is en sy geskiedennis, sy heldedom, sy vryheidstryd en sy stryd om die behoud van sy geesteserfenis voorstel, is dit gepas om in die krisis wat tans beleef word, die woorde van Malan as besielende vertrekpunt te neem.

Dat hierdie beraad gereël word in die jaar waarin die her-denking van die Tweede Vryheidsoorlog begin, is nie sonder betekenis nie. Dit is sekerlik reg dat die gebeure van 'n eeu gelede in die Boere-Afrikanervolk se besinning oor sy toekoms 'n duidelike plek sal inneem omdat daardie oorlog aan hom by uitstek 'n heldedom en voorraad heldedade gegee het wat steeds as besieling vir die hede en die toekoms moet dien. Soos die Bittereinders van destyds geweier het om eerloos oor te gee, so is dit die plig van die huidige geslagte om vas te staan in die gees van daardie Bittereinders.

Die beraad sal drie sittings beslaan, elk met 'n kort inleiding en voldoende besprekingstyd. Prof Andries Raath van die UOVS, Bloemfontein, sal tydens die eerste sitting 'n analise van die huidige toestand lewer met verwysing na die Boere-Afrikaners se verlies van hul staatkundige vryheid en onafhanklikheid. Tydens die tweede sitting sal twee senior studente van die Akademie, mnre Slabbert le Cornu en Wilhelm Pretorius, 'n voorraad-opname maak van die geestesgoedere waaroor die Boere-Afrikanervolk beskik wat hom in staat kan stel om uit die krisis te kom. Daarna sal ds Sarel Cilliers, van die Gereformeerde kerk Waterberg, in die derde sitting die aanwending van die beskikbare geestesgoedere in die Boere-Afrikaner se stryd uiteensit om uit die krisistoestand uit te kom. Ten slotte sal prof Alkmaar Swart nog 'n samevattende toespraak aan die deelnemers lewer voordat die beraad verdaag.

Met hierdie aanbieding wil die Akademie as onverbonde en onafhanklike instelling 'n geleentheid daarstel waar Boere-Afrikaners openlik oor die toestand van die volk kan praat. Sy bede is dat die troue Verbondsgod hierdie werk genadiglik sal seën sodat daaruit nuwe koers en nuwe doelgerigtheid vir die Boerevolk na vore sal kom.

Verdere besonderhede sal in die komende weke bekendgestel word. Diegene wat belangstel om na die beraad uitgenooi te word, kan solank hulle name en adresse aan die registrateur van die Akademie deurgee. Die telefoon en faksnommers die pos- en E-posadresse is hieronder vermeld.

Dr P van der Dussen (Registrateur)

Telefoon  (012) 365 3703
Faks  (012) 365 3677
Seltel  082 820 5298
E-Pos   acvho@mweb.co.za