Die Kerkpad
"Laat ons wandel in die lig van die Here"
(Jes 2 ; 3 - 5)
Jaargang 3 No 4 Julie 1999
KERKLIKE JOERNAALVOORMALIGE LERAAR VAN DIE GEREFORMEERDE KERKE IN STRYD MET DIE WAARHEID EN DIE GESAG VAN DIE HEILIGE SKRIF Ontstellende feit oor dr Willem de Klerk se betwyfeling van die Skrifgefundeerde geloof
In 'n verslag op versoek van die GTV Pretoria en die Redaksie van Die Kerkblad, lewer dr Klasie Heystek in 'n uitgawe van
DIE KERKBLAD (2 Junie 1999, bl 16 en 17) 'n oorsigtelike opsomming van dr WJ de Klerk se omstrede Skrifbeskouing wat hy tydens 'n vergadering van die GTV, in die kerkgebou van die Gereformeerde Kerk Sunnyside op Maandag 8 Februarie 1999, na aanleiding van sy boek "Die vreemde God en sy mense" vir 'n gehoor van nagenoeg 140 belangstellendes uitgespreek het.Sy uitgesproke betwyfeling van die Skrifgesag is te meer ontstellend omdat die verslag vermeld dat groot "waardering" vir hom en sy sienings betuig word en dat 'n "klein groepie gelowiges wat in Johannesburg oor die sake begin gesels het, tot 'n aansienlike groep aangegroei het".
Dit wys soos 'n kankergeswel, wat as dit nie spoedig operatief verwyder word nie, deur die hele gestel versprei en die dood van 'n pasiënt veroorsaak.
Voordat hy as leraar in verskeie gemeentes van die GKSA gedien het, het hy belowe en onderteken om niks te leer of te skrywe, hetsy openlik of in die geheim, direk of indirek, wat in stryd is met die artikels en stukke van die leer wat in die Formuliere van Eenheid vervat is nie.
Kernpunte in die geding volgens De Klerk
Dr De Klerk oordeel dat ongeveer 60% lidmate kerklik afsydig geraak het. Hulle is onbetrokke, apaties en word steeds meer en meer van die kerk vervreem. Die rede? Die tradisies, gebruike, maar veral die belydenisse en standpunte van die kerk het ongeloofwaardig geword. Daar is duisende mense wat met ons eietydse vraagstukke worstel, maar nie deur die kerk gehoor of geantwoord word nie.
Dat die sake wat dr De Klerk noem, nie as speletjies of fiksie afgemaak kan word nie, blyk daaruit dat sy boek, Die vreemde God en sy mense, tans sy vyfde vermeerderde druk beleef in 'n baie kort tydperk. Dr De Klerk ontvang ook talle uitnodigings deur verskillende organisasies om met hulle oor sy sieninge te kom praat. Groot waardering word betuig. 'n Klein groepie gelowiges wat in Johannesburg oor die sake begin gesels het, het aangegroei tot 'n aansienlike groep. Naas waardering ontvang hy egter gereeld ook felle kritiek.
Dr de Klerk is van mening dat die volgende sake in heroorweging geneem moet word:
Dat net die Christendom die ware God ken en aanbid. Volgens dr De Klerk aanbid alle (G)odsdienste die ware God. Die Christendom interpreteer Hom net die suiwerste.
Dat Christus net vir die Christene (dit is gelowiges) gesterf het. Volgens dr De Klerk het Jesus (onvoorwaardelik) vir die hele wêreld gesterf en daarom kan God mense salig maak ter wille van Jesus sonder dat hulle Hom hoef te ken of te aanvaar.
Dat homoseksualiteit sonde is. Volgens dr De Klerk skryf die Bybel oor homoseksualiteit vanuit 'n bepaalde kultuur. Destyds was dit onaanvaarbaar, vandag is dit aanvaarbaar. Die bedoeling van die Bybel is nie om ewig-geldende uitsprake hieroor te doen nie.
Dat daar so iets soos 'n duiwel of demone is. Volgens dr De Klerk is daar wel so iets soos die Bose ('n misterie), maar nie so iets soos 'n duiwel en sy trawante nie. Die twee pole van goed en kwaad vind jy in alle godsdienste.
Dat die Bybel 'n foutlose goddelike geskrif is. Volgens dr De Klerk bevat die Bybel wel "betroubare interpretasies" oor God. Daar is egter ook baie dinge wat krom, skeef en vol foute is.
Die skeppingsverhaal en vroeë geskiedenis van die wêreld (Gen 1 - 11) is, volgens dr De Klerk, die ene simboliek. So ook Jona. Job is 'n epos.
Dat Adam en Eva die eerste twee mense was. Volgens dr De Klerk was daar 4 miljoen jaar gelede primitiewe (aap-?) mense. Toe kom die mense soos ons (120 000 - 40 000 jaar gelede). Toe die verbondsmense Adam en Eva.
Dat seks vir die huwelik bedoel is. Volgens dr De Klerk word vrye seks oral aanvaar. Binne die kerk en daarbuite. In die huwelik en daarbuite. Of ons dit wil weet of nie. Seks is 'n manier waarop twee mense bepaal of hulle bymekaar hoort.
Tereg vra dr Heystek: "Waar vind die (post) moderne mens die antwoorde waarna hy soek? Vind ons dit in uitgesifte 'betroubare interpretasies' oor God en sy wil in die Bybel en ander godsdienstige geskrifte? Vind ons dit in die teenswoordige kultuur, eietydse denkpatrone, wetenskaplike navorsing en resultate? Moet ons dit vind in ons 'aanvoeling' van wat reg en verkeerd is? Moet ons ruimte skep vir relatiewe denke en leefwyses omdat ons voor talle 'misteries' staan? Moet ons aanvaar dat ons 'nie meer weet nie', nooit meer sal weet nie? Lê die oplossing in kompromieë en vindingryke harmoniseringe van teensprekende standpunte?"
Die regte antwoord is, soos dr Heystek later sê: "Wanneer ons die Bybel lees, moet ons dit nie verstaan soos ons wil nie, maar soos die Heilige Gees ons lei volgens die bedoeling van die Skrif."
Dr De Klerk het hom uitgesproke geskaar aan die kant van die Skrifkritiek, wat hy tans huldig. Hoewel hy lankal, volgens art 12 KO, tot 'n "ander staat van die lewe" oorgegaan het, staan hy nogtans onder die leer- en regeergesag, onder die amptelike bediening van die kerklike tug van die kerkraad van dié gemeente waarvan hy tans 'n ingeskrewe lidmaat is. Die verwaarlosing van die kerklike tug lei, soos 'n kankergeswel in 'n siek liggaam, tot die hierbo genoemde aangroeiing van 'n klein groepie tot 'n aansienlike groep.
Om die openlike verkondiging van die Skrifkritiek, die relativering en betwyfeling van die waarheid van die Woord van God binne kerkverband op sy beloop te laat, is in stryd met die wil van die Here wat ywer vir die heiligheid van sy Naam. "Ons glo ... dat die regeerders van die kerk, al is dit nuttig en goed om onder mekaar 'n bepaalde orde tot instandhouding van die liggaam van die kerk in te stel en te handhaaf, tog noukeurig moet oppas om nie af te wyk van wat Christus, ons enigste Meester, vir ons ingestel het nie. ... Daarvoor is nodig die ban en alles wat daarmee saamhang, toegepas ooreenkomstig die Woord van God (NGB, art 32).