Die Kerkpad
"Laat ons wandel in die lig van die Here"
(Jes 2 ; 3 - 5)

Jaargang 3  No 4  Julie  1999

Persrubriek

KERK IN 'N KRISIS

Prof H van der Wateren skryf onder hierdie hofie in
BYBEL EN VOLK

(Desember 1998, bl 24 en 25)

Die sinode van die NG Kerk het merkwaardige sake opgelewer.

Die Belhar Belydenis was al etlike kere ter sprake rondom 'n soge-naamde kerkeenheid. Toe die poging om dit as vierde belydenis vanjaar misluk het, het die eenheidsdrywers 'n nuwe wending aan die saak gegee: Eenheid met of sonder die Belydenis.

Met biegformules oor die wrede apartheid is daar tog 'n stappie gevorder op die pad na 'n eenheidskerk. Of daardie manne lidmate in eie geledere vervreem, maak blykbaar nie saak nie.

'n Tweede kwessie wat verreikende gevolge gaan hê, is die besluit dat kinders ook nagmaal kan gebruik. Dit lyk nie asof hierdie besluit na deeglike Skrifstudie geneem is nie. Nog minder getuig dit van die onderhouding van die Belydenis - die Drie Formuliere van Eenheid.

In werklikheid word met hierdie besluit 'n streep getrek deur groot dele van die Belydenis. En so het die NG Kerk nie alleen sy lidmate onder gewetensdwang geplaas nie, maar neem die sinode duidelik standpunt in teen die ander Belydeniskerke.

Is dit werklik moontlik dat een sinode besluite kan neem wat een-heid en skeuring wil bevorder? Wat meer is, die NG Kerk beweeg hom hiermee op die glybaan van die sektes. Die meeste sektes ontspring uit die kwessie van klein- of grootdoop. Met die sogenaamde groot doop word die eerste sakrament aan belydenis-volwassenheid verbind. Nou het die NG Kerk die tweede sakrament aan Belydenis onvolwassenheid verbind.

Waarmee gaan die "mondige" mens van ons tyd nog speel om die Here te terg? Ons het al dikwels geskryf dat ons 'n reformasie nodig het.

Met sulke sinodebesluite word dit 'n dringende appèl. En as dit dan lei tot nuwe kerkskeure, moet een saak duidelik in gedagte gehou word:

Kerkskeuring ontspring nie in menslike strukture nie, maar dit begin waar daar van die Woord afgedwaal word. Dan is skeuring nie alleen wenslik nie, maar noodsaaklik.