Die Kerkpad
"Laat ons wandel in die lig van die Here"
(Jes 2 ; 3 - 5)

Jaargang 5  No 2 Maart 2001

KERKLIKE JOERNAAL

Dominees se preke word nie meer vanselfsprekend as gesaghebbend aanvaar nie. Daarom is 'n nuwe benadering tot die opleiding van predikante noodsaaklik.

Dreyer het gesê in 'n patriargale struktuur met outoritêre kommunikasie is preke vanselfsprekend as gesaghebbend aanvaar. In 'n na-moderne tyd is dit nie meer die geval nie.

Vroeër is daar baie klem gelê op die akademiese opleiding van predikante omdat dit hulle sou help om die Bybel reg uit te lê en hul boodskap met gesag te verkondig.

Goeie opleiding en logiese argumente is egter nie meer vandag genoeg nie. Kritiese teologiebeoefening aan universiteite het daartoe gelei dat die gesag van die Bybel ''aan flarde'' is.

Volgens prof Dreyer moet iets van die verhouding met God en die lewe in teenwoordigheid van God in die preke neerslag vind. Dit vra 'n deurleefde geestelikheid van predikante. Aspekte soos die gesag van die bybelse boodskap moet spontaan vanuit die predikant se menswees deur lidmate as eg beleef word. Preke moet ook nie net logiese argumente bevat nie, maar ervaringstaal wat tot die hele menswees spreek.

Redaksionele Kommentaar:

Op die bogenoemde wyse is die gesag van die prediking nie geleë in die suiwere Woordverkondiging, die vertolking van die skriftuurlike verbondseën en die verbondsbedreiging, die Woordbediening: ''So sê die HERE Here'' nie. Dit verlê die gesag van die Woordbediening van die Bybel, wat die bewys en gesag in homself het (NGB, art 5), na die prediker wat charismatiese gawes en metodes moet hê en aanwend om geloofwaardig en gesaghebbend te kan wees.