Die Kerkpad
"Laat ons wandel in die lig van die Here"
(Jes 2 ; 3 - 5)
Jaargang 5 No 2 Maart 2001
Persrubriek JESUS SE OPSTANDING VRA GELOOFPROF GJC (JORRIE) JORDAAN IN DIE ALGEMENE KERKBODE VAN 9 ; 10 FEBRUARIE 2001, BL 5
Die liggaamlike opstanding van Jesus Christus het die afgelope paar maande weer in die teologiese spervuur te staan gekom. Enkele prominente teoloë het gekom met die redenasie dat dit wetenskaplik onmoontlik is dat Jesus werklik dood was en weer lewendig geword het. Daarom is Jesus se opstanding 'n storie - fiksie, 'n mite - deur die vroeë kerk gefabriseer. Gevolglik moet die Christendom die opstandingsverhaal maar liewer as 'n stuk simboliek beskou: miskien as 'n blote geestelike herlewing van dit waarvoor Jesus gestaan het, in die lewe van die Christene. Maar solank as wat Christene 'n werklik liggaamlike opstanding van Jesus probeer handhaaf en verdedig, sê die geleerdes, maak hulle hulleself belaglik en ongeloofwaardig in die oë van die moderne wêreld.
Hierdie skeptiese kyk op Jesus se opstanding is niks nuuts nie. Toe die apostel Paulus in Athene die opstan-ding van Christus aan die Grieke verkondig het, het baie van hulle hom uitgelag (Hand 17 : 32). In 1 Korinthiërs 1 : 24 24 skryf Paulus dan ook dat Christus wat gekruisig is, vir die Jode 'n aanstoot is en vir die Grieke onsin. ... maar vir die wat deur God geroep is, is Hy die krag van God en die wysheid van God.
Die probleem met die Atheners van destyds en met skeptici van vandag is dat hulle Jesus se opstanding met die verstand wil verklaar. Hulle vergeet dat sy opstanding 'n absolute wonder was. Juis daarom is dit nie met die verstand wetenskaplik verklaarbaar nie. As die wetenskap sy opstanding sou kon verklaar, sou dit nie meer 'n wonder wees nie. Maar omdat dit 'n wonder was, vra die opgestane Jesus nie bewyse nie maar geloof. Geloof, lees ons in Hebreërs 11 : 1:''... is 'n vaste vertroue op die dinge wat ons hoop, 'n bewys van die sake wat ons nie sien nie.''
Elkeen wat die opstanding van Jesus Christus verwerp, om watter rede ook al, wys nie hoe wetenskaplik en rasioneel hy is nie, maar wys sy gebrek aan geloof. In plaas daarvan om aan sulke mense se skeptiese vrae toe te gee, moet ons hulle weer-lê en aan hulle die woorde van Romei-ne 10 : 9 verkondig:: '' As jy met jou mond die Here Jesus bely en met jou hart glo dat God Hom uit die dode opgewek het, sal jy gered word.''