Die Kerkpad
"Laat ons wandel in die lig van die Here"
(Jes 2 ; 3 - 5)

Jaargang 4  No 3  Mei 2000

KERKLIKE JOERNAAL

GEREFORMEERDE PREDIKANT BEDANK UIT SY AMP EN ONTTREK AAN DIE GKSA KERKVERBAND PERSVERKLARING VAN DS WJ FOURIE

"Ek het gister (19 Maart) my diens as Herder en Leraar van die Gereformeerde Kerk Bloemfontein Wes beëindig. ...

"Dit is vir my belangrik om te sê dat hierdie stap nie gemotiveer word deur enige bedenking teenoor die Gereformeerde belydenis nie en dat ek met die grootste vrymoedigheid dit steeds sou onderteken as die napraat van die Skrif.

"Die stap hou ook 'n breek met die kerkverband in. Dit is net logies dat 'n verskil in visie dit onmoontlik maak om in dieselfde omgewing te bly", aldus ds Fourie.

"Die kultuur van passiwiteit, kritiese negatiwiteit en gepaardgaande konflik pas nie by dit wat ek in die Skrif sien nie. Ek is van die oortuiging dat daar 'n kultuurverandering moet plaasvind om ons in lyn te bring met die vorm van kerkwees soos ons in die Nuwe Testament, in Efesiërs 4 en Handelinge 2 vind."

Hy sal nog besluit oor die kerkverband waarby hy en sy gesin hulle sal aansluit. "Tans is ek by my vrou se onderneming betrokke. Daar is groeiende uitdagings. Ek sien met entoesiasme daarna uit om ten volle my gewig daar te gee."