Die Kerkpad
"Laat ons wandel in die lig van die Here"
(Jes 2 ; 3 - 5)
Jaargang 4 No 3 Mei 2000
REDAKSIONEELSedert die verskyning van die vorige uitgawe het letterlik en figuurlik baie water na die see gespoel, meer as wat normaalweg die geval is. Ons bevestig weer ons medelye met diegene wat familielede aan die dood afgestaan het en van hulle besittings en finansiële inkomste verloor het.
Daar is egter meer waar ons die aandag op wil vestig en dit is die toenemende geweld en 'n dreigende oorlog in ons noordelike buurstaat Zimbabwe. Die spanning wat daar ontwikkel kan maklik oorslaan na ander dele van Afrika, ook na ons eie land.
Die tekens is reeds daar en van ons mense, veral die boere, hou die asem op. Plaasmoorde en -berowing vind stelselmatig plaas en die owerhede slaag nie daarin om dit doeltreffend te beheer nie. Maar daar is meer en nog erger dinge wat gebeur.
Die toename in die sekularisering van die samelewing wat gelei het tot die instelling van 'n staatslotery, wat 'n groot deel van ons land se bevolking, blank en swart, laat deelneem aan 'n goddelose hebsug en hoop om sonder inspanning miljoenêr te kan word. Derduisende lidmate van die Afrikaanse kerke neem openlik of skelm daaraan deel. Doen die gereformeerde "susterkerke" genoeg om hierdie euwel in hulle geskrifte en die prediking van die Woord aan te spreek?
Nog 'n saak is dié van sportvergoding en heldeverering wat met die Hansie Cronjé debakel tot 'n uitbarsting gekom het. Dit bevestig tewens dat op alle vlakke van die samelewing, selfs waar jy dit nie verwag nie, materiële hebsug die oorsaak is van immoraliteit en toenemende korrupsie. ®