Die Kerkpad
"Laat ons wandel in die lig van die Here"
(Jes 2 ; 3 - 5)

Jaargang 4  No 6 November 2000

OPVOEDING EN ONDERWYS

BZN (Blad zonder naam) 'n ''nie-amptelike nuusbrief oor amptelike skoolsake ...'' vermeld in sy eerste uitgawe (Jaargang 1 van 2000, no 1) op bl 4 en 5 oor die matriekeksamens van Arso-skole as volg:

Tot onlangs toe was alle ARSO-skole laerskole. Met die ontwikkeling en uitbreiding na hoërskole, het die behoefte ontstaan om die verskillende matriekeksamens te ondersoek en 'n keuse te maak aangesien dit die inhoude van die leerstof kan beïnvloed. Die hoërskoolkomitee van die GSDP (Gereformeerde Skool Dirk Postma) het saam met ARSO die eksamens ondersoek.

Drie moontlikhede is veral ondersoek, naamlik

• die Onafhanklike Eksamineringsraad (IEB) se eksamen,
• die BCVO Eksamenraad se eksamen en
• die Gesamentlike Matrikulasieraad (Provinsiale Departement van Onderwys) s'n.

Dit word op hierdie stadium aanbeveel dat skole verbonde aan ARSO die departementele eindeksamen skryf. Die hoofoorwegings vir hierdie aanbeveling is:

• Binne hierdie departementele raamwerk kan die gereformeerde onderwys voldoende beoefen en uitgebou word.
• Ons ARSO-skole behou die selfstandigheid om ons eie kurrikulum ten volle toe te pas.
• Koste-aspek sonder ooglopende voordele aan die ander beskikbare opsies.

Hierdie aanbevelings is onderhewig aan heroorweging indien omstandighede in die toekoms sodanig verander dat ons skool nie meer volgens beginselgrondslag kan opereer nie.