Die Kerkpad
"Laat ons wandel in die lig van die Here"
(Jes 2 ; 3 - 5)

Jaargang 3  No 6  November  1999

POLITIEKE KRONIEK

DIE ANC
TEENOOR DIE GEREFORMEERDE (CHRISTELIKE)
GELOOF EN LEWENSBESKOUING

- P VAN DER KOOI -

(Vorige Aflewering)

9. "THE ROAD TO DAMASCUS" 1)

The Road to Damascus roep die Suid-Afrikaanse ge-meenskap op rondom die bekeringsverhaal van Paulus op die Damaskuspad (Hand 9 : 3 - 5). Hierdie gemeenskaplike bekering draai rondom die persoon van Jesus. In The Road to Damascus word Hy voorgehou as die God net van die arme en van die bevryding van die onderdrukte. "In preaching the Reign of God Jesus was prophesying the coming of a new world order. This brought him into conflict with the status quo of his time, the religious and political authorities. They found his preaching 'subversive'. That is why they conspired to kill him."

Schillebeeckx skryf oor hierdie Jesus-beeld: "Wie die Abba-ervaring (die besondere verhouding tussen Jesus en sy Vader) weglaat, maak van die verwagting van Jesus 'n utopie. Sonder die Abba-ervaring word die historiese Jesusbeeld volkome vermink, sy boodskap van die Godsryk ontkrag, en sy lewenspraktyk beroof van die sin wat Hy daaraan gee."

Die ANC het vanuit sy rewolusionêre aard die kerk in Suid-Afrika nodig vir sy bevrydingstryd. As instituut is die kerk nodig om die "nasionaal demokratiese bewegings en organisasies" in 'n verenigde front saam te bind. Die bindingskomponent is die beleid- en belydenisgeskrifte van die "belydende beweging", wat op die Kontekstuele Teologie, as Bevrydingsteologie en protesteologie gefundeer is. Die kerk word hierdeur so verpolitiseer dat die kerk in 'n politieke front en protesbeweging verander word. Die kerk as organisme word deur die BCC's omskep deur selle wat binne die kerk as instituut werk, om sodoende die kerk tot kontekstualisering te dwing en die bevrydingstryd van die ANC te steun. Dit word in die kerkleiding bereik deur "dialoog" as wapen van on(op)gemerkte ideologiese oorbrenging van die Marxistiese begrippe en ideale.

Die ANC en die Kerk in Suid-Afrika is daar, om of die pad van die Marxistiese rewolusie of die van die Gereformeerde Protestantse reformasie te loop. Die verskille lê duidelik vir hulle wat dit in die lig van Gods Woord beoordeel. Nihilisme, die vernietiging van die bestaande orde, nie net van politieke en ekonomiese orde nie, maar ook van die godsdienstige en sedelike orde en alle hoër geestelike waardes, is die uiteindelike doel van die Marxisme. Dit kan alleen gebeur indien die Christusbeskouing verander soos deur die verkondigers van die Bevrydingsteologie gepropageer word. Die Jesus van die Marxisme is 'n "Jezus zonder God".

Die ANC se rewolusie staan 'n gewelddadige kon-frontasie met die Reformasie en die vrugte daarvan voor. Om sy ideaal te bereik predik die rewolusie 'n "nuwe" ideologie (afgodsdiens) aan die bevolking. Dié rewolusie is daarom 'n regsmiskennende en regsvernietigende gewelddadige handeling. Reformasie eis erkenning, ten spyte van wantoestande, dat regsgegewens en regsverhoudinge (gesagsaanvaarding) bestaan, wat goed is en gehandhaaf moet bly. Gewelddadige konfrontasie is op Skrifgronde verwerplik veral as reformatoriese beginsels aangewend word om die optrede te regverdig.

Die rewolusie vernietig die verlede. Reformasie daarenteen eis erkenning dat die geskiedenis in Gods hand is en Gods wil openbaar. Rewolusie is opportunisties en is die laagste vorm van misleiding, wat van geen reg of waarheid wil weet nie. Reformasie is nie opportunisties nie, maar geskied volgens beginsels en die sedewette van Gods Woord. Die Marxistiese rewolusie verwerp die morele en sedelike en verlaag sodoende die mens tot 'n offer van die bevrydingstryd. Die gestorte bloed van die rewolusionêr is dan die bevrydende bloed van Jesus. Die reformasie bring die opheffing van die mens, nie tot net 'n politieke bevryde mens nie, maar tot 'n verhewe herstelde beelddraer van God deur die volkome aanvaarding van die verlossende versoeningsdood van Jesus Christus. Die rewolusie beskou die kerk as 'n voertuig vir bevryding: 'n verkondiger van die "demokratiese" boodskap. Die reformasie beskou die kerk as die draer van die boodskap van verlossing en die herstel van die verloregaande mens in die gemeenskap met God.

Die stryd en keuse lê vir ons tussen die "kerk" van die ANC en die Kerk van Christus, tussen die ideologie van Bevryding en die teologie van Verlossing. Die ANC se aanwending van die godsdiens en die kerk vra van elkeen, dat ons liefde vir Jesus Christus al hoe meer sal toeneem in begrip en fyn aanvoeling sodat ons sal kan onderskei waarop dit werklik aankom.