29 en 30 Oktober 1999 te Pretoria

Die basiese vertrekpunt van die Skrifkritiek is dat die Bybel nie die Woord van God is nie. Variasies daarvan is dat dit nie onfeilbaar die Woord van God is nie, of dat nie die hele Bybel die Woord van God is nie.

Hierdie standpunte kom voort uit die histories-kritiese ondersoek van die Skrif. Daar is natuurlik nie fout daarmee om die Skrif te ondersoek nie. Trouens, dit is ons roeping. Daar is selfs nie fout daarmee om krities in die ondersoek te wees nie - dit is juis daar-om dat 'n wetenskap soos Tekskritiek tot stand gekom het. Dit was noodsaaklik om sover moontlik wetenskaplik vas te stel watter manuskripte die oorspronklike teks weergee. Verder moet daar eerlik met die Skrif omgegaan word sodat die ondersoeker nie die Skrif laat buikspreek of dit altyd bloot op sigwaarde gelees word nie. Die ondersoeker moet juis die bedoeling van 'n teks of Skrifdeel probeer gryp. Hy moet rekening hou met die direkte en wyer verbande waarin elke woord staan. Maar die punt is: Dan is dit nie 'n kritiese ingesteldheid teenoor die Bybel nie, maar 'n bedagwees daarop of die Bybel reg verstaan word.

Wanneer die kritiese 'n verheffing bo die boodskap, bo die leer van die Bybel, bo die inspirasie van die Skrif word, word dit onaanvaarbaar. As die kritiese ingesteldheid nie op my verstaan van die Bybel gerig is nie, maar op die Goddelike gesag van die Skrif; as my uitgangspunt 'n benadering vanuit die ongeloof is; of as ek myself bó die Skrif stel omdat ek die betroubaarheid daarvan afhanklik van my logika maak, of van die mens se insig of ander menslike kriteria, dan is daar geen sprake meer van 'n Gereformeerde Skrifbeskouing nie. ...

*   In ons dag word die wonders en wondertekens waarvan die Skrif melding maak, deur die Skrifkritiek óf bevraagteken óf verwerp. Daar word geredeneer dat as 'n wonder wat tóe plaasgevind het, nie meer vandag gebeur nie, dit nie waar kon en kan wees nie.

 1. Die Forum is oortuig dat die gevolge van die aantasting van die gesag van die Heilige Skrif, onder die dekmantel van die wetenskap so skrikwekkend, vernietigend en verlammend vir die kerk van Christus is, dat ons ‘n dringende beroep op geleerdes en wetenskaplikes doen om hulle daarvan te weerhou om in menslike dwaasheid strepe deur die Bybel te trek en dit aan die kerkvolk voor te hou, asof slegs teoloë die Skrif reg kan verstaan en uitlê.

2. Die Forum betreur dit dat sommige teoloë in hul eie willekeurige vertolking, onder andere die beskouing van Adam en Eva as nie-historiese figure, die kerkvolk mislei en verlei. Deur sodanige vertolking is hulle besig om die hele leer van God se Woord te verwring. Daarmee skep en glo hulle feitlik ‘n ander evangelie. (Vgl Gal 1:6, 8 - 9).

3. Die Forum glo en bely die Heilige Skrif as die Woord van God en aanvaar daarom die absolute, onfeilbare en onveranderlike gesag van die hele Skrif. Daarom verwerp ons die standpunt dat die oorsprong en die letterlike of historiese waarheid van die Bybel nie belangrik is nie, maar dat die belangrikheid van die Skrif geleë is in die uitwerking wat dit op vandag se lesers en hoorders het.

4. Die Forum doen ‘n beroep op kerkrade en kerkverbande wat op die grondslag van die Drie Formuliere van Eenheid staan, om teoloë (lidmate) wat Skrifkrities die Woord vertolk en wat die inhoudelike van die Skrif en Belydenisskrifte aantas en dit verloën, tot bekering te roep en om, indien hulle in hul dwaalleer volhard, die kerklike tug toe te pas.

5. Die Forum is oortuig dat die postmodernisme wat in verklarings van sommige teoloë en standpunte van kerklike kommissies en vergaderings voorkom, waarin homoseksualisme beskou en gepropageer word as nie strydig met die Woord van God nie, ‘n dodelike virus is wat die gesag van die Skrif aantas.

6. Hierdie Forum aanvaar dat die wesenlike eenheid tussen gemeentes / kerke nie bepaal word deur hulle naam of kerkverband nie maar deur hulle onderwerping aan die gesag van die Skrif. Die vashou aan die onfeilbaarheid van die Bybel, soos by hierdie Simposium gestel, moet die saambindende faktor tussen gereformeerdes in Suid-Afrika wees.

7. Die Forum doen ‘n beroep op kerkrade om in die openbaar standpunt teen die Skrifkritiek in te neem sodat dit landswyd bekend kan word.

8. Die bywoners van hierdie Simposium versoek diegene wat dit gereël het, om 'n soortgelyke geleentheid te organiseer waarop ander belangrike implikasies van Skrifgesag aan die orde gestel kan word, sodat die neerslag daarvan tot beskikking kan kom van lidmate van die Afrikaanse Kerke van Gereformeerde belydenis, om sodoende mee te werk aan die toerusting van die Skrifgebonde gelowiges.