Die Kerkpad: November 99 Fondsinsameling gekoppel aan lotings en prystrekkings

Van verskeie kante word ons redaksie gekonfronteer met tereg genoemde besware teen die gewoonte om publieke en kerklike insameling van fondse te adverteer met 'n verleidelike moontlikheid om 'n prys te kan wen. Daardie prys word gewoonlik bepaal deur 'n spesifieke nommer te wen of te trek. So lees ons in 'n advertensie in DIE KERKBLAD van 11 Augustus 1999 in 'n bekendstelling vir 'n gesinskamp van die Gereformeerde Kerk Beestekraal onder andere: "Daar is ook 'n wildpakket te wen vir 'n gelukkige gesin". Dit is aan ons bevestig dat dit 'n (lotings-) prystrekking betref het. 'n Ander intekenaar/leser uit Burgersdorp het aan ons 'n plaaslike advertensie van die Gereformeerde Kerk Burgersdorp oorgefaks oor 'n "Draf-stap-trap" op 9 Augustus 1999, waaraan ook prystrekkings verbind was: "Geen wenpryse maar prystrekkings". Om op dié wyse fondse in te samel is teen die beginsel dat winsbejag gepaard sal gaan met die bydrae aan die fondse vir die Kerk van die Here. Dit lyk so onskuldig omdat dit klein sake betref, maar dit lei veral die jongeres, op die verkeerde pad om later die casino's te gaan besoek vir die groter winsbejag.