DS AH (ANDRIES) MULDER GEëMERITEER

DS AH (ANDRIES) MULDER

GEëMERITEER

Ds Andries Mulder, leraar van die Gereformeerde Kerk Pretoria, het op Sondag 19 Augustus weens 'n ongeneeslike siekte voortydig geëmeriteer.

Deur die jare het hy sy plek in die Kerk sowel as in die samelewing volgestaan en heelhartig uitgeleef. Na voltooiing van sy studies het hy ses beroepe ontvang. Die beroep na Louis Trichardt is opgevolg en aldaar is hy op 1 Februarie 1969 bevestig. Daarna het hy agtereenvolgens ook die gemeentes van Innesdal, Middelburg (Tr), Randfontein Noord en dié van die "Paul Krugerkerk" bedien.

Gedurende die tyd van sy bediening het hy op verskeie deputate van die Nasionale Sinode gedien. Daarbenewens was hy ook sterk by die onderwys, kultuur en ook by die weermag as 'n kapelaan betrokke.

Hy het op die Beheerliggame van 17 skole gedien en op 2 Skoolrade as voorsitter. Hy was ook in 1989 deur die minister aangestel op die Beheerliggaam van Prinshofskool vir blinde en swaksiende kinders, asook op die Raad vir Buitegewone Onderwys.

Tydens die vergadering van ''Bekommerde Gereformeerdes'', op 8 Maart 1994, is hy benoem as lid van die''Voortsettingskomitee'' . Hy het daarin gedien totdat dié Komitee in Februarie 1997 ontbind het.