Die Kerkpad
"Laat ons wandel in die lig van die Here"
(Jes 2 ; 3 - 5)
Jaargang 3 No 5 September 1999
OPVOEDING EN ONDERWYS Jan H van Wyk,in lewe professor in Teoretiese Opvoedkunde PU vir CHO
skryf in sy werk:
STROMINGE IN DIE OPVOEDINGSTEORIE
(Durban: Butterworth 1979, bl 47/48)
"Deur proses en doel te vereenselwig, verloor die opvoeding rigting. Waarheen is die opvoeding op weg as daar nie ook 'n doel buite die opvoedingshandeling lê nie? ...
"'n Vaste doel bring geen verstarring nie omdat dit in hierdie bedeling van gebrokenheid nie verwerklik kan word nie en dus juis 'n blywende rigtinggewende faktor is.
"Om sosiale bruikbaarheid as doel vir die opvoeding te stel, is om die sondige, gebroke, skeefgetrekte samelewing as norm te neem.
"Om sosiale bruikbaarheid as norm vir curriculumvasstelling te beskou is humanisties. Die Christenopvoeder vra: Watter kennis rus die kind toe vir sy primêre roeping om God en sy naaste lief te hê en sy kultuurtaak tot heil van sy medemens en tot eer van sy Skepper na te kom?
"Die skoolaktiwiteit is nie, soos die pragmatis leer, ten eerste op die sedelike opvoeding ter wille van sosiale nut gemik nie, maar op religieuse oriëntering sodat hy al sy aktiwiteite
in diens van die omvattende koninkryk van God kan stel. Die skool moet teosentries wees in al sy geledinge, nie pedosentries nie. Ook die kind moet God dien.
"Die 'doenskool' en 'luisterskool' staan nie antiteties teenoor mekaar nie; die skool is albei, want luister is ook doen, 'n aktiewe handeling. Die pragmatisme oordryf die handearbeid; denkarbeid is van net soveel waarde."